للقتل اضغط واحد
سيناريو - الحلقة الأولى
مشهد افتتاحي، قبل التتر:
الكادر غير واضح على مستوى الصورة. يرجى تشويش الصورة بعض الشيء لإخفاء ملامح المكان.
م افتتاحي مطبخ في منزل ما
تتحرك طفلة صغيرة باتجاه هاتف في المطبخ. ترفع سماعة الهاتف بحذر تصرخ فجأة بهيستريا ويتحشرج صوتها محاولة قول شيء ما.
ينقطع صوتها بما يعني انقطاع الخط عن الهاتف.
Cut
نفس تفاصيل المشهد، الفتاة تنظر باتجاه الباب. تتحرك الكاميرا باتجاهها بما يعني أن شخص ما قادم نحوها. تصرخ مرة أخرى.
Cut
التــــتــــــــر.
م 1 ن.د.. المكان غرفة نوم
يظهر الكادر أمير نائمًا على السرير.
أمير يستيقظ مفزوعا ثم ينظر للهاتف. ينتفض واقفا.
Cut
م 2 ن.د .. نفس الغرفة
يظهر الكادر أمير واقفًا في الغرفة التي لا تظهر تفاصيلها، ملابسه غير مهندمة ويبدو أنه ارتادها على عجل. يضع حقيبة على ظهره وينطلق مسرعا باتجاه الباب.
أمير يفتح باب الشقة مستعدا للخروج. يخرج من الباب يمشي خطوتين في طرقة خافتة الإضاءة، ينغلق الباب من خلفه دون أن يغلقه أحد.
ثم يظهر أمامه باب آخر مغلق. يفتح الباب الذي ظهر ثم تظهر طرقة أخرى خافتة الإضاءة يخطو أمير داخلها، فينغلق الباب من خلفه ثم يظهر باب آخر ليصبح أمير بين بابين ينظر خلفه ثم يفتح الباب الذي ظهر أمامه ويخطو في الطرقة الجديدة ثم ينغلق الباب الذي خلفه فينظر خلفه مرة أخرى سريعة بعد أن أصبح بين بابين مرة أخرى. يكمل طريقه إلى الباب الجديد وقد بدا الارتباك والتوتر عليه.
يفتح الباب الجديد. ينغلق القديم خلفه. يصبح بين بابين. يفتح الجديد. طرقة جديدة. ينغلق القديم. بين بابين مرة أخرى.
يأخذ القرار بالتراجع يفتح الباب من خلفه لا يجد طرقة، يجد بابًا آخر ولكن بلا مسافة. يفتح الباب الذي ظهر فيظهر باب آخر بنفس المسافة الصغيرة جدا، يستمر في فتح الأبواب، بسرعة ولا تظهر غير أبواب ثم أبواب. يعود مرة أخرى للأبواب التي تظهر خلفها طرقة فتظهر طرقة جديدة طويلة ذات إضاءة خافتة ولكن نهايتها جدار وليس باب. يخطو داخلها. فتتحول إلى مصعد. ويهبط بسرعة خرافية. ثم يتحول إلى ستيشن كول سنتر وأمير بداخلها جالسًا على كرسي يرتدي هيدفون بينما تتحول جدران الأسانسير لسماعات كبيرة تتنطلق منها أصوات.
- مساء الخير أمير مع حضرتك
- النت فاصل بقاله يومين
- هاتلي التيم ليدر
- مع حضرتك يا فندم
- هتابع مع حضرتك خلال ساعة
يستيقظ أمير من النوم بحركة حادة.
Cut
م 3 ن.د (حمام منزل أمير)
أمير يظهر في مرآة الحمام توبلس، يغسل أسنانه بإيقاع بطيء نوعًا ما لكنه لا ينظر لانعكاس صورته في المرآة، ينتهي من غسل أسنانه ثم يرتدي تي شيرت ويخرج من الحمام/الكادر. لنجد أنه كان مرتديا بنظلون وكوتشي.
Cut
م4 ن.خ (وقت طلوع الشمس)
يُظهر الكادر شارع طويل وقت طلوع الشمس. الشارع فارغ تماما إلا من صوت بعض العصافير. من آخر الشارع يأتي أمير، يمشي بإيقاع بطيء. يقترب من الكاميرا فتظهر ملامحه رويدا رويدا. يبدو عليه أنه لم يستيقظ تماما ولكنه يمشي بحركات آلية حتى يتجاوز الكادر.
أمير:
تي شيرت بولو. شعر طويل نسبيا. غير معتنى به. لحية طويلة نسبيا غير معتنى بها. جينز. كونفيرس. شنطة ضهر. سماعات كبيرة حول رقبته.
م5 ن د قاعة تدريب (شركة كول سنتر)
تظهر كارما وفي يدها ماركر، وخلفها وايت بورد مكتوب عليها (سرية بيانات العملاء) بخط كبير. تحت هذا العنوان مكتوب بخط صغير مجموعة نقاط:
1 -ممنوع الإفصاح عن بيانات العملاء حتى للعميل نفسه.
2 -ممنوع الورقة والقلم وممنوع الموبايل.
3 -ممنوع مراجعة بيانات العميل، العميل هو اللي يراجع خصوصا لو متكلم من رقم مش على السيستم.
كارما:
- بند سرية البيانات مفيهوش هزار والغلطة فيه ممكن تعمل مشكلات كبيرة.
عندنا مجموعة من المحاذير اللي ما ينفعش بمعنى ما ينفعش (تضغط على الكلمة) نقع فيها. زي مثلا إن العميل يكلمك فانت تراجع معاه البيانات، زمان كنا أول ما ناخد المكالمة بنراجع البيانات مع العميل ما دام متصل من نفس الرقم. دلوقتي أوعى!، لازم هو اللي يراجع البيانات ولو العميل قفش بنعتذر ونهاندل ونقول إن ده عشان سرية البيانات.
(تنظر في الفراغ كمن يتذكر شيئًا ثم تبتسم ابتسامة خفيفة وتكمل)
- من فترة كول سنتر آجنت لمطعم مشهور أخد مكالمة، العميلة بتتصل من موبايل جوزها، الرقم عليه أكونت وطبعا الأكونت عليه البيانات. الآجنت اللي رد عليها راجع معاها العنوان عشان الدليفري، تمام؟
(تستكمل دون أن تنتظر الرد)
- للأسف مش تمام. لأن العميل ده كان مسجل عنوان مختلف عن عنوان بيته، الكوستمر سمعت العنوان من أخينا الآجنت وشكرته وقفلت.
(تضحك ضحكة خفيفة)
- بعد ما قفلت خدت بعضها وراحت على العنوان إياه فاكتشفت إن جوزها متجوز عليها وده عنوان بيته التاني. الراجل بيته اتخرب.
( تضحك ضحكة عالية نسبيًا)
- الراجل بيته اتخرب، هو يستاهل طبعا، بس إحنا ملناش دعوة. المهم العميل اتصل بالشركة وقلب الدنيا واتهمهم بتسريب البيانات.
- النقطة التانية. برضه في غاية الأهمية، ممنوع منعًا باتًا إننا نسيب ورقة وقلم أو موبايل على الـ ستيشن. حضرتك هتقول وإيه لازمة التعسيف؟!
الحقيقة إنه مش تعسيف ولا حاجة، كل الحكاية إن ده بروتوكول متبع في الكول سنتر في كل العالم، عشان محدش يصور أو ينقل البيانات من الكمبيوتر، وده ممكن يستغل أسوأ استغلال. طبعا إحنا بنستخدمه لأغراض الشقطوكده، بس ما علينا. المهم نعرف إن ده شيء ممكن يقفل الشركة عادي.
Cut
م 6 ن د الشركة
أمير يجلس في ستيشن الشغل يرتدي السماعات ويتحرك بالكرسي يمينا ويسارا.
أمير (ينظر للسقف ومازال يتحرك بالكرسي):
- أنا هنا يا فندم عشان أساعد حضرتك طبعا، تحت أمر.. تـ ..تـ..(يتهته بما يعني أن العميل يقاطعه) تحت أمرك يا فندم.. أكيد ..أكيد.
يمر يوسف من خلف أمير ويلمس كتفه لمسة خفيفة ويقول بصوت منخفض:
- إيه يا صاحبي
أمير يضغط زر الميوت ويقول:
- حبيبي!
يبدأ الكادر في الاتساع مع فيد أوت لصوت أمير وهو يكمل المكالمة، إلى أن يتلاشى صوت أمير تماما مع اتساع الكادر ليكشف الفلور كله بينما همهمات الموظفين تملأ المكان.
Cut
م 7 ن د (دايننج رووم الشركة)
أمير ويوسف جالسان على ترابيزة يتناولان ساندوتشات بيتي
أمير :
- تسلم إيد مامتك والله
يوسف :
- ملكش دعوة
أمير ( يبتسم)
يوسف :
- أنا بفكر أخلي امي كل يوم تعمل عشين تلاتين شندوش وآجي أبيعهم هنا واطلّع مصلحة.
أمير:
- هشتري منك.
يوسف:
- بدل سندوتشات الجبس اللي بناكلها هنا دي، أكل معفن وبيجوع وغالي.
أمير:
- هتشوف الماتش فين النهاردة؟
يوسف:
- في العوامة... تعالى معايا، العيال كلهم جايين.
أمير:
- لا، مش حابب أقعد مع ناس، لو غيرت رأيك عرفني بس ننزل نتفرج سوا.
يوسف:
- غيرت رأيي يا شِق.بعد الشيفت هروّح آكل لقمة واغيّر وانزل، نتقابل 8 ع القهوة.
أمير (ينظر نظرة ممتنة ليوسف) :
- أمين يا صديقي
Cut
م 8 ل.د (كافيه ديكوره شيك)
(نهائي التشامبيونز ليج وإصابة محمد صلاح)
كارما وأصدقاءها (3 بنات و4 أولاد)يتابعون الشاشة بشغف.
كارما :
- مووو صلاح مو صلاح رانينج داون ذا وينج... صلاا صلااا صلاااا إيجيبشن كيينج!
أصدقاء كارما يرددون معها الأغنية
يتغير اللوكيشن.
م 9 ل.خ (قهوة في الشارع)
أمير يناول يوسف سيجارة ثم يشعل أخرى.
يوسف ( وهو يتابع الشاشة):
- باصي لصلاح يا حبيبي باصي يا بني
أمير (يضحك)
- هما شغالين عنده يا عم؟
يوسف :
- أه
أمير (متأملا الشاشة وعلى وجهه نظرة إعجاب):
- بحب نجاحه أوي يا أخي.
يوسف:
- ربنا يحميه ويكفيه شر الإصابات.
أمير:
- انت عارف إني بسبب صلاح رجعت أصدق في نفسي تاني وقررت إني لازم أعمل الكارير شيفت.
يوسف لا ينتبه تماما لكلام أمير بينما ينظر إلى الشاشة حيث صلاح سقط بعد تدخل راموس العنيف.
يوسف:
- يا دين أمي! لا.. لأة بقاا. يا دين أُمااااي.
أمير(بصوت خافت مصدوم):
- قوم يا محمد. قوم يا صلاح والنبي.
الكاميرا تنتقل للتلفزيون. صلاح يقوم بالفعل. ولكنه يقع على الأرض مرة ثانية باكيًا.
يوسف:
- لا يا صلاح ما تخرجش وحياة أمك.
الكاميرا تنتقل من الشاشة إلى كارما وصديقاتها ويظهر على وجوههن الحزن الشديد ثم تنتقل الكاميرا مرة أخرى لشاشة التلفزيون ثم تنتقل إلى أمير ويوسف.
أمير يبدو على وجهه التأثر الشديد. عيناه دامعتان وعلى وشك البكاء.
يقوم أمير بحركة بطيئة ثم ينظر ليوسف:
- أنا مش عايز أكمل الماتش. معلش أنا همشي.
يوسف:
- هو فاكس ماتش خلاص. تعالى نشرب قهوة في المحمصة.
زووم أوت يُظهر الكادر وجوه الحاضرين وقد سادها الحزن والصمت (إغلاق الصوت تماما عند الوصول لهذه النقطة)
زووم أوت مرة أخرى يظهر الكادر المقاهي المجاورة وهي صامتة تماما وعلى وجوه جميع المشاهدين حزن ووجوم.
زووم أوت مرة أخرى تصعد الكاميرا إلى أعلى. لتظهر المباني والتجمعات السكنية مع استمرار إغلاق الصوت.
Cut
م. 10 ل.خ (المحمصة بعد الماتش)
(أمير ويوسف)
- راموس ده صفيحة زبالة أقسم بالله! عربجي! دي رياضة دي؟!. ده لعب يعني؟! ربنا يستر وصلاح يلحق كاس العالم.
أمير(يصمت ثواني، ثم يتكلم بشكل قوي ومتواصل وثابت وهادئ):
- تعرف، إحنا ما بنحبش صلاح عشان لعيب حلو ولا عشان إنجازاته. ولو ان إنجازاته عظيمة طبعا. لكن إحنا شايفين في صلاح نفسنا. كل واحد فينا شايف نفسه وظروفه اللي ضاغطة عليه. المجتمع اللي مش مديله فرصة يحاول. الأسرة اللي حرمتنا من حقنا في الغلط وإعادة المحاولة. قلة الفلوس وعدم إيمان أي حد بيك. شايفين فيه حقيقة ممنوعة عننا. والحقيقة دي إننا نقدر ننجح. ومش بس ننجح . إحنا ننجح جدا جدا. ونوصل للي عايزينه مهما كان باين مستحيل. أنا بحب صلاح عشان هو قالي إني إنسان من حقي أنجح. قالي من غير ما يتكلم إني لازم ما ابطلش أحاول. وإن النجاح في المتناول رغم كل شيء. وعشان كده أنا واثق إنه هيقوم وهيبقى أحسن من الأول إن شاء الله.
(يوسف ينظر لأمير مندهشا من استرساله):
- بس راموس ده برضه عيل سرسجي وما اترباش. يارب يجيله صليبي يبطله كورة.
(أمير يضحك):
- والله انت جميل يا يوسف.
(ثانيتين صمت)
يوسف:
- انت بقالك كام يوم مش مظبوط خلي بالك. بس انا سايبك براحتك.
أمير (يصمت)
يوسف:
- أه صح، البروفيت شير نزل، ابقى بص على حسابك
أمير:
- حصل، سحبتهم إمبارح أصلا.
(ثانيتين صمت)
أمير:
- عايز أبقى كويس يا يوسف
يوسف:
- هتبقى كويس، اعتمد على الوقت بس
أمير :
- وقت إيه بس، بقالنا 5 شهور مفركشين.
يوسف:
وكنتوا مع بعض 3 سنين، فأكيد يعني5 شهور مش كفاية
أمير:
- هي سابتني ليه والله؟
يوسف:
- عشان ملهاش في الطيب نصيب
أمير:
- يللّا، الله يسهلها.
يوسف:
- يللّا الله يحرقها.
أمير (يضحك):
- يا جدع حرام عليك!
يوسف:
- الله يمسيها بالخير، كانت شبه آخر الشهر.
أمير( يضحك)
Cut
م 11 ل.د( كارما بعد الماتش)
كارما وأصحابها.
بنت:
- جماعة احنا سهرانين النهاردة عند تُقى عشان عيد ميلادها.
كارما:
- يا جماعة عندي شغل بدري!
بنت أخرى:
- أمال مين اللي هيغني يا بنتي. خدي بالك تُقى قماصة، هتقفش عليكي عشان بتغني في أعياد ميلاد كل الناس وهي لأ
كارما (تضحك):
- أنا هغني بفلوس بعد كده والله.
Cut
م 12 ل.د (منزل.عيد ميلاد)
كارما تجلس وحولها صديقاتها وبعض الضيوف.
كارما تُغني:
آه يا حلو
أه يا حلو يا مسلِّيني
يللي بنار الهجر كاويني
إملا المدام يا جميل واسقيني
من كثر شوقي عليك ما بنام
حبِّيت جميل يا ريتني ظلُّه
حاز الجمال والحسن كلُّه
لمَّا رأيت ملك فؤادي
صَبَّرت قلبي وحملت ذلٌّه
أبيض ويا، يا لون الياسمين
يللي على خدَّك شكَّل ورد
وحياة خدودك والجبين
إني أسير المودَّة
ما ضنّ قلبي تنساني
وتزيد في حبَّك أشجاني
عُد يا جميل عُدْ لي تاني
من كثر شوقي عليك ما بنام
Cut
م 13 ن د ( فرع شركة أجهزة تيكنولوجية)
سمر واقفة داخل الفرع ترتدي يونيفورم الشركة. وتتكلم مع أحد الزبائن. بينما يوسف جالس في ركن الفرع في انتظار انتهائها من الكلام.
سمر:
- شرفتنا يا فندم.
يخرج الزبون من الفرع. بينما يتقدم يوسف باتجاه سمر.
يوسف:
- مساء الخير. فيه ملوخية مُجمدَة؟
سمر( تضحك) :
- فيه ملوخية بالأنارب
يوسف:
- أنارب!
سمر:
- إنجز يا عم أنا جوة الشيفت.
يوسف:
- جوة الشيفت!
سمر تضحك:
- إنجز يا يوسف عشان الشغل والله.
يوسف:
- أنا قلت أعدي عليكي، أديكي هدية واعزمك على آيس كريم ولا حاجة بدل ما انتي مقضياها إكسسوارات كمبيوتر كده.
يضع أمامها كتاب مغلف ويقول:
- كيف تصبحين جيرل فريند مش نكدية في 3 أيام بدون معلم.
سمر تفك غلاف الكتاب، تنتقل الكاميرا على الغلاف ( The Great Gatsby)
سمر (بفرح):
- فعلا؟! والله العظيم انت أجمل واحد في الدنيا. استناني نصاية الشيفت هيخلص وهمشي معاك.
Cut
م 14 ل د في (محل آيس كريم)
يوسف وسمر يتناولان آيس كريم.
سمر:
- انت ازاي افتكرت اسم الكتاب؟
يوسف:
- عيب عليكي، أنا مبحبش القراية أه، بس مركز
سمر:
- كان نفسي أقراها أوي، شكرا يا حبيبي والله شكرا شكرا.
يوسف:
- مية وعشين جنيه بس
سمر:
- مالك؟
يوسف:
- ولا أي حاجة يا صاحبي، دي حاجة بسيطة.
سمر:
- لازم تعرف إن دي حاجة غالية عليا والله، مش مصدقة! انت لقطت اسم الكتاب لما كنت بحكي عن الفيلم صح؟ والله انت تجنن.
يوسف:
- مثقف يا بنتي انتي فاكرة إيه؟
سمر: (تضحك)
- طبعا مثقف! يا عم انت بتقرا الجورنان أصلا؟!
يوسف:
- إسمه جورنال.
(سمر تضحك)
يوسف:
- بقول إيه، هنلعب النهاردة الساعة 10، تيجي تتفرجي؟
سمر:
- ماشي
Cut
م 15 ل د (ملعب كورة خماسي)
فرقتين في الملعب بينما يوسف يقف على الخط ويشير للموبايل ويقول بصوت عال:
- تايم أب يا رجالة
يتوقف الماتش بينما ينزل يوسف وفرقته إلى الملعب ويبدأ الماتش الجديد.
تحركات يوسف في الملعب تدل على لاعب كرة قدم قديم، يباصي الكرة لزميله ليضعه أمام المرمى مباشرة فيحرز زميله الهدف.
Cut
م 16 ل.د (الملعب)
يأتي الشاب المسؤول عن تأجير الملعب في النادي مسرعا ويدخل أرض الملعب:
الشاب:
- يللا يا رجالة تايم أب عشان فيه حجز بعديكوا.
(ينهي الشباب المباراة بشكل آلي)
يدخل صالح ومعه بعض الشباب إلى أرض الملعب.
الشاب المسؤول عن الحجز:
- تؤمرني بأي حاجة يا صالح باشا؟
Cut
م 17 ل خ (نفس الملعب)
يوسف غير ملابسه ، وعلى ظهره حقيبة رياضية.
ويتمشى هو وأصدقائه.
أحد الشباب:
- مفيش مستويات خالص
يوسف (يضحك)
- صوتك طلع ما شاء الله. كل ده عشان كسبت ماتش أخيرًا. يا بني ده انا بقالي سنتين بلعب على حسابك
الشاب:
- سيبني أحتفل يا حبيبي، سيبني يا بابا أفرح بانتصاري
يوسف يضحك:
- ماشي يا عم عاش، عقبال الشامبيونز ليج
(يظهر أمير فجأة من الطريق المواجه)
أمير:
- فيه لعيّبة؟
يوسف:
- مفيش لعب.
أمير:
- عايزك طيب.
يتحرك أمير ويوسف ويجلسان أمام المكان على سور ما.
أمير:
- عايز أسواب معاك شيفت بكرة.
يوسف:
- يا اعم ارحمني بقى
أمير:
- هعزمك على سينما
يوسف:
- يا بني بكرة عندي تمرينة مهمة!
أمير:
- يا جو ضروري والله، عايز أروح الانترفيو بتاعت السفر دي
يوسف:
- يا بني إنت مش قلت مش عايز تسافر
أمير:
- عايز اشوف الدنيا فيها ايه بس.
يوسف:
- سينما وغدا
أمير:
- ديل.
يوسف:
- ماشي، أتمرن بالليل وأمري لله.
Cut
م 18 ن.د (مكتب سفريات)
مكتب يجلس عليه شاب في منتصف الثلاثينات وبنت في بداية الثلاثينات، وأمير يجلس أمامهم.
البنت:
- إنترديوس يور سيلف.
أمير:
- أم أمير الريس، أم فريش جراديوتيت أنـد...
الفتاة تقاطعه:
- فريش!؟ هاو أولد أر يو؟!
أمير:
- تويني سيفن
الفتاة يبدو عليها الاستغراب:
- أوكاي
الرجل الجالس:
- السي في بتاعك مكتوب فيه 5 سنين خبرة كول سنتر
أمير:
- هو انا لسة متخرج بس أنا بشتغل من زمان، ده اللي أخرني عامة في الدراسة.
الرجل (بطريقة اعتيادية):
- طيب ممتاز، الوظيفة المتاحة هتكون في كول سنتر لمجموعة مطاعم في الكويت، الراتب هيبقى 175 دينار كويتي، هنخلصلك الفيزا وهتقسط انت تمنها من مرتبك لما تستلم الشغل إن شاء الله.
أمير:
- تمام
Cut
م 19 ن د ( الشركة. اللوكر)
(أمير ويوسف)
يوسف:
- أخبار الانترفيو إيه؟
أمير:
- طلع أوردر تيكر، وكومبلين دليفري وشيء مقرف.
يوسف:
- يا خسارة التمرينة اللي راحت. (يستكمل بجدية) طب ما بتفكرش تجرب؟
أمير:
- لا لا فاكس. أنا أساسا مش عايز أسافر. على فكرة صح أنا قدمت في ورشة الكاريكاتير. هبدأ من بكرة إن شاء الله
يوسف:
- عاش والله. بالتوفيق يا زميلي.
أمير(يبدو الخجل على ملامحه):
- هتأخر بكرة نص ساعة وعايزك تغطيني
يوسف (يعطيه مفتاح اللوكر. متجاهلا كلامه):
- أنا هطير أنا.
أمير:
- نص ساعة بس والله. دي أول سيشن في الورشة وعايز افهم الدنيا.
يوسف يبدو عليه التردد لحظة ثم يقول محذرًا:
- نص ساعة يا أمير.
أمير:
- نص ساعة والله
Cut
م 20 ن.خ (باص الشغل بعد الشيفت)
أمير يبدو عليه الإرهاق الشديد. يضع سدادت الأذن ويسند رأسه على الزجاج وينظر للشارع.
يمر الباص من أمام أحد الميادين. ينظر أمير ليجد شاب وفتاة يجلسان على رصيف صغير داخل حديقة.
(فلاش باك. أمير وندى)
يرى أمير نفسه وحبيبته السابقة جالسان على الرصيف.
CUT
م 21 ن.خ
فلاش باك. أمير وندى
(أمير وندى يجلسان على رصيف في ميدان عام، ندى تحتضن ذراعه)
ندى:
- كل ما افتكر أول يوم أشوفك فيه بضحك بس. مكنتش طايقاك يا أمير ولما رحتلك البلكونة وشكرتك على الرسمة كنت رايحة أساسا أتخانق معاك يا بارد. (تضحك) البروجيكت كله كان واقف مستني الفنان يخلص الرسمة (تضربه على كتفه وتبتسم) بس لما ادورتلي كده وضحكت في وشي اتلخفنت. (تبتسم) في اللحظة دي لقيت نفسي بحبك.
(أمير يضحك)
_ ثواني صمت_
أمير (بحنان):
- أنا بحبك جدا على فكرة.
ندى:
- عارفة.
أمير (يغير لهجته إلى الجدية المازحة):
- انتي فاكرة إننا قاعدين ع الرصيف عشان مش معايا فلوس؟! إطلاقا! كل الحكاية إن الخدمة عجباني هنا.
ندى (تضحك)
- على فكرة، والله العظيم مش فارق معايا قاعدة على رصيف ولا قاعدة في كافيه. المهم إني قاعدة معاك.
أمير(يبتسم):
- أنا رايح إنترفيو شغل بكرة.
ندى:
- شغل إيه؟
أمير:
- شركة كول سنتر.
ندى (باستغراب):
- كول سنتر! بس انت بتكره الكول سنتر! وبعدين هتعمل ايه في كورس الرسم؟!
أمير :
- هأجل الكورس فترة كده لحد ما ربنا يسهل.
ندى:
- لا مش هتعمل كده طبعا، إحنا قطعنا شوط كويس.
أمير:
- مفيش فلوس أكمل يا ندى، وبعدين لازم الشغل عشان أحوش للخطوبة
ندى:
- ما تعملش كده عشاني لو سمحت، أنا مش هسمح أبدا إنك تضحي بحياتك اللي بتحبها وتعمل حاجات بتكرهها بسببي
أمير (يبتسم):
- هنرجع لكل الخطط في الوقت المناسب والله.
ندى:
- مش عارفة! حاسة إنك أحسن تكمل الكورس ونكمل المحاولة للآخر.
أمير :
- المحاولة هتيجي في وقتها إن شاء الله.
Cut
م 22 ل.د
( يبدو مظهر أمير بعيدا عن التأنق. الذي كان واضحًا في أول مشهد له مع ندى ويبدو الإجهاد واضحا عليه)
(أمير وندى ويوسف وسمر في كافيه)
أمير:
- أنا عازمكوا النهاردة جميعًا بمناسبة أول قبض ليا كـ كول سنتر آجنت قد الدنيا.
يوسف:
- صاحب واجب طول عمرك يا خال
سمر:
- عقبال أول قبض وانت مترقي
أمير:
- ربنا يخليكوا يا جماعة
ندى (بطريقة جافة نوعا ما):
- أنا عشر دقايق بالكتير وهمشي عشان مش هينفع اتأخر.
أمير :
- هخلص النسكافيه وهوصلك.
Cut
م 23 ل.خ
(أمير وندى بيتمشوا)
ندى:
- هو انت مش كنت بتقول نازل الشغل ده عشان نحوش للخطوبة؟
أمير:
- أكيد
ندى:
- أمال إيه لازمتها بقى العزومات؟
أمير:
- عزومات؟! دول 150 جنيه يا ندى! وبعدين أنا قلت نقضي يوم لطيف مع الراجل اللي فضل ساندني في الظروف المنيلة!
ندى:
- وانت بتقبض كام 150 جنيه أصلا! وبعدين هو أنا مش سانداك في ظروفك المنيلة يعني؟!
أمير:
- وانتي إيه علاقتك بالكلام يا بنتي؟!
ندى:
- ولا أي علاقة. أنا مروّحة. سلام!
(ندى تنصرف، بينما أمير ينظر إليها مشدوها)
Cut
م 24 ن. د (وورك سبيس)
المكان عبارة عن وورك سبيس، لطيف التصميم. كراسي خشبية ملونة ورفوف كُتب على الحائط. لوحات على الحائط، فاترينات زجاجية معلقة على الحائط بها بعض منتجات هاند ميد (حظاظات و عقود وسلاسل ودريم كاتشر وشنط ومحافظ وجرابات موبايل)
مجموعة كبيرة من الشباب منهمكين في العمل. رسامون وكُتّاب وشباب يصنعون أشياء بأيديهم. (نجارة وجلد طبيعي وحظاظات)
يجلس أمير على كرسي منكبًا على سكتش رسم، وعلى الترابيزة أمامه كوب قهوة وكيس تبغ وطفاية بها سيجارة مشتعلة.
ندى:
- فنان كبير
أمير:
- جمهورتي الحبيبة
ندى:
- إنت ليه عمرك ما رسمتني؟!
أمير:
- بخاف ما تطلعش الرسمة حلوة
ندى:
- أي كلام
أمير:
- أبدا والله، ده السبب الحقيقي. لو رسمتك والرسمة ما طلعتش زي م انا عايز هتضايق فعلا.
ندى:
- أستحق المحاولة على الأقل
أمير (يبتسم خجلا):
- انتي معاكي حق، أنا أسف. هحاول حالا بالا
ندى:
- مكانش المفروض أقولك على فكرة
أمير (يعقد حاجبيه):
- هو فيه إيه؟!
ندى:
- مفيش!
أمير (يبدأ في لف سيجارة جديدة):
- انتي مش ملاحظة انك بقالك فترة قافشة بس؟
ندى:
- لا مش ملاحظة، إنت ملاحظ؟
أمير:
- ملاحظ جدا على فكرة. أنا عملت ايه مخليكي مش طايقاني كده؟
ندى:
- معملتش حاجة يا أمير. وأظن إن ده كفاية يخليني قافشة
أمير:
- مش فاهم!
ندى:
- يعني بقالك دلوقتي كام شهر شغال ومدخلتش حتى جمعية عشان الخطوبة زي ما كنت بتقول ولا حتى بتفكر في الموضوع.
أمير :
- ازاي بس ما بفكرش في الموضوع، نزولي الشغل ده مش كان عشان الموضوع أصلا؟! وبعدين لو عايزاني أدخل جمعية ما قولتيش ليه؟
ندى:
- ودي كمان لازم اقولها؟!
أمير:
- ماشي. أنا معنديش مشكلة أدخل جمعية والله. أنا بس كان عليا شوية فلوس وكنت بسددهم الكام شهر اللي فاتوا وبعدين كنت ناوي أحو....
ندى (تقاطعه) :
- أنا مش عايزة أكمل.
أمير (يسكت ثواني):
- ده كلام حقيقي؟... ولا هترجعي تقولي بيريود؟
ندى:
- كلام حقيقي وأخير.
Cut
م 25 ن خ
أمير مستند على شجرة في حديقة عامة وفي يده سكتش رسم.
تمر فتاة صغيرة:
- عمو، عايزة حاجة لله.
أمير:
- اسمك إيه يا حبيبتي؟
البنت:
- منار
أمير:
- عندك كام سنة؟
منار:
- سبعة
أمير:
- تحبي تقعدي معايا شوية؟
منار:
- هتديني حاجة لله؟
أمير:
- لو قعدتي شوية
منار:
- ماشي
أمير:
- هرسملك رسمة وهديكي فلوس تجيبي حاجة حلوة
منار:
- أنا عايزة حاجة لله
أمير (يضحك)
- حاضر والله، تعالي اقعدي بس.
تجلس الفتاة بجانب أمير الذي يبدأ في رسمها بسرعة، يستمر أمير في الرسم، وبعد أن ينتهي يعطيها الرسمة. تأتي الكاميرا على الرسمة لنجد أن أمير رسم منار كاريكاتير.
أمير:
- إيه رأيك؟
منار:
- هو أنا مبعجرة كده؟
أمير يضحك:
- لا انتي زي القمر.
منار:
- عايزة رسمة مش مبعجرة.
أمير:
- مرة تانية بقى يا منار عشان عندي شغل ومتأخر.
(يلم حاجاته ويتحرك)
Cut
م 26 ن.د (قاعة محاضرات)
محاضر شاب، شعر طويل مجعد، يرتدي نظارة، بنطلون جينز وتي شيرت بولو.
المحاضر:
- كلمة كاريكاتير مشتقة من الكلمة الإيطالية كاريكير ومعناها ( يبالغ) وبتستخدم لما حد يحمل حاجة أكتر من طاقتها. وبشكل عام الكاريكيتر مش رسومات للتسلية. الكاريكاتير فن ناقد ساخر وراصد للمجتمعات وسياسات الدول. رسام الكاريكاتير لازم يكون شخص عنده وجهة نظر.
(تنتقل الكاميرا لأمير الذي يجلس وسط الحضور وأمامه دفتر رسومات مغلق)
Cut
م 27 ن د( نفس المكان لكن في بريك)
أمير يقف مع الشاب المحاضر يدخنان ويشربان مشروب ساخن.
الشاب:
- عجباك الورشة؟
أمير:
- دي لسة أول سيشن بس قشطة يعني الدنيا ظريفة.
الشاب:
- إيه سبب اهتمامك بالكاريكاتير.
أمير:
- والله هو مش الكاريكاتيربالتحديد، أنا بحب الرسم بشكل عام وأخدت كام ورشة، وبرسم بورتريه كويس.وبحب الكاريكاتير. بس سبب إني جيت بصراحة إني نفسي أعمل كارير شيفت وفيه مجلة طالبة رسامين كاريكاتير فبشوف الدنيا كده، عشان أقدم.
الشاب:
- إنت بتشتغل إيه؟
أمير:
- سماعة.
الشاب:
- كول سنتر! لازم تشيفت طبعًا.
الشاب:
- معاك رسومات ليك؟
أمير يعطيه الدفترالمقفول.
(الشاب يفتح الدفتر ويتصفحه)
الشاب:
- انت مش محتاج ورشة على فكرة، ما تكملش الورشة هنا، وخد رقمي وابعتلي واتساب. تعالى نقعد نرغي شوية.
أمير:
- تمام.
Cut
م 28 ن.د (الشركة)
أمير يدخل الفلور بحركة سريعة. يوسف يشير له فيتوجه له.
يوسف:
- أنا لاججلك إن ومقضيها أوكس إن في أوت بقالي ساعة.
أمير:
- حبيبي
يوسف:
- أنا عارف إني هتّرمن على إيدك والله.
أمير(يضحك):
- ده أنا كده أبقى خدمتك.
م 29 ن د (شركة الكول سنتر)
أمير على الستيشن الخاص به يتلقى مكالمة من عميل بينما تقترب منه كارما دون صوت وفي يدها سبلتر وسماعات، تقوم بتوصيل السماعات بهاتف أمير الذي ينظر لها فتشير إليه أن يكمل.
تجلس كارما جوار أمير وتشادو المكالمة. (تسمع المكالمة معاه وهو بيتكلم)
أمير:
- شكرا لاتصالك يا فندم.
(يغلق المكالمة)
كارما:
- حُط تريننجAux وتعالى يا أمير بليز.
(يدخلان غرفة ذات جدران زجاجية)
كارما:
- عندنا غلطين، واحد كريتيكال و واحد نَن كريتيكال
أمير:
- تمام.
كارما:
- العميل، لما عطس إنت كان لازم تقوله ألف سلامة على حضرتك، أو يرحمكم الله أو أي حاجة.
أمير:
- تمام.
كارما:
- الكريتيكال بقى إنك قلت للعميل إنك معندكش معلومات عن العرض الجديد. أولا العرض الجديد اتبعتلك على الميل امبارح، ثانيا حتى لو ده محصلش، فانت مينفعش تقول كده أبدا. عامة أنا مش هحطلك الأخطاء دي في الشيت. بس خلي بالك لو سمحت، أنا أكيد مش هفوّت كل مرة.
أمير:
- هو شكرا ليكي، بس حطيهم في الشيت عادي أنا مش فارق معايا.
كارما (تنظر في عينينه بهدوء) :
- الميتنج خلص يا أمير، تقدر تفُك الأوكس.
Cut
م 30 ن.د ( سموكنج إيريا)
(أمير ويوسف وفي يد كل واحد منهم مشروب وسيجارة)
أمير:
- كنت هاخد وورنج ليتر النهاردة
يوسف:
- يا ساتر!، خير يا فنان؟
أمير:
- مقولتش للكاستومار (ينطقها بطريقة مضحكة) يرحمكم الله.
يوسف:
- لا ملكش حق.
أمير:
- أنا تعبت م الشغلانة دي يا جو والله. أنا لازم هعمل كارير شيفت
يوسف (ساخرا):
- برافو عليك، وهتشتغل إيه؟
أمير:
- هشتغل كلاكيت ب200 جنيه في اليوم
يوسف (ينظر للسقف بطريقة متمأملة ويقول ببطء وهو يحرك يده بشكل مسرحي):
- أميركلاكيت. إسم فني خد بالك
أمير:
- أمال إنت فاكر إيه. تعالى اشتغل معايا بقى.
يوسف:
- لا انا هتشغل صياد محار
أمير:
- أحلى كارير شيفت
يوسف:
- بقولك إيه صح.بالنسبة للـ 200 جنيه اللي عليك إيه؟
أمير:
- بتاعة إيه؟
يوسف:
- الولية بتاعة ثري بيلبوردس أخدت أحسن ممثلة. الرهان اللي مش راضي تدفع فلوسه.
أمير:
- لا مارجو روبي هي اللي كسبت ومش معنى إنهم كسبوا واحدة تانية يبقى كده هي ما كسبتش.
يوسف:
- كل ده عشان 200 جنيه. اعتبرهم ضاعوا يا أخي!
أمير:
- لا مش عشان 200 جنيه ولا حاجة. بس عشان أنا مش معترف غير باللي أنا مقتنع بيه. أنا اللي بدي الأوسكار يا حبيبي.
يوسف:
- انت عندك مشاكل في دماغك على فكرة.
أمير (يبتسم ويلقي السيجارة على الأرض ويدهسها بقدمه) :
- طب يللا عشان البريك خلص.
Cut
م 31 ن.خ (الشركة)
يوسف على الستيشن بتاعته.
يوسف:
- يوسف مع حضرتك يا فندم
يوسف:
- أكيد يا فندم. ياريت تخليك معايا لحظات هشوف إذا كان زميلي متاح يكلم حضرتك ولا لأ.
يوسف:
- أكيد يا فندم. حتى لو مش متاح هتأكد إنه يكلمك حاضر. لحظات معايا.
يضع يوسف العميل على الانتظار ثم ينظر أمامه إلى ستيشن يجلس عليها شاب نحيف نوعا ما ويرتدي نظارة. جينز وكوتشي وتي شيرت سادة.
يوسف:
- بنهاوي. هحولك مكالمة.
بنهاوي (يبدو عليه الارتباك):
- مكالمة إيه. لأ إستنى.
(يتجاهله يوسف ثم يعود للعميل مرة أخرة)
يوسف:
- شكرا لانتظار حضرتك وبعتذر جدًا عن التأخير. هحول حضرتك على زميلي محمد البنهاوي حالا.
(يضغط يوسف على زر في الأفايا أمامه فيرن هاتف البنهاوي الذي ينظر إلى يوسف بارتباك واضح بينما يوسف يشير إليه أن تمام)
يرد بنهاوي على المكالمة بسرعة ثم يضغط زر في الأفايا وينطلق مسرعا إلى ستيشن في آخر الرو ويرفع سماعة الهاتف بينما يوسف يتابعه باستغراب.
م 32 ن.د(الشركة)
يظهر الكادر بنهاوي وهو مازال على نفس الستيشن وعلى أذنه سماعة الهاتف.
بنهاوي (يتكلم ببطء ويضغط على سماعة الهاتف في يده وعلى الكلام)
- يا ريت حضرتك ما تحاولش تتواصل معايا تاني
بنهاوي:
- مش هنتفق.
بنهاوي يغلق السماعة مرتبكا ويعود ويجلس في الستيشن الخاصة به. يتسع الكادر لنرى يوسف يتابعه في صمت ولكن من مسافة لا يمكنه معها سماعه بوضوح.
CUT
م 33 ن.د (الشركة)
أمير يتلقى مكالمة في الشغل:
- مساء الخير. أمير مع حضرتك.
العميل:
- سوري أمير. إنت سبيك إنجلش؟
أمير:
- آآ آآآ هاو كان أي هيلب يو؟
العميل:
- أنا كان عايز يتكلم مع زميلك محمد بنهاوي. هو معاه ماي كيس.
أمير:
- تمام يا فندم هشوف إذا كان متاح واحول حضرتك.
العميل:
- شكرا.
(فجأة يدخل على الخط صوت فتاة تصرخ)
ينقطع صوت الصراخ فجأة.
أمير(ملامحه ترتبك وتتشكك):
- حضرتك معايا يا فندم؟
(الطرف الثاني صامت)
أمير:
- حضرتك معايا؟
العميل يغلق السكة.
أمير ينظر للشاشة باستغراب.
CUT